LABURREAN:
Proiektuaren izena: “Herriko Jauregiak Gipuzkoan: komunitatea sortzeko azpiegitura komunitarioak ezaugarritzen”
Norekin elkarlanean: Juntura kooperatiba / Gipuzkoako Foru Aldundiaren diru-laguntzarekin
Proiektuaren urtea: 2024-2025
2024-2025 epealdian, Farapi partaidetza kooperatibak eta Juntura arkitekto taldeak “Herriko Jauregiak Gipuzkoan: komunitatea sortzeko azpiegitura komunitarioak ezaugarritzen” proiektua garatu dugu, Gipuzkoako Foru Aldundiaren Etorkizuna Eraikiz diru-laguntzaren esplorazio proiektuen deialdian.
Prozesu honen asmoa ekipamendu publikoek komunitategintza indartzeko duten ahalmena lantzea izan da. Proiektua garatu ahala, ohartu gara ekipamendu publikoetako sarrerek, hall-ek eta pasilloek (hemendik aurrera, “tarteko espazioak”) komunitatearen ehungile bilakatzeko potentzialtasun handia dutela.
Areto eta geletara sartu aurretik, ekipamendu publikoek hainbat espazio dituzte, eta sarritan erabilera edota balio gutxi ematen zaie. Proiektu honetan, Gipuzkoako hiru ekipamendutako tarteko espazioak behatu ditugu, eta herritarren artean gertatzen diren interakzioak eta izaera komunitarioa nola lurreratzen den aztertu dugu.
Hala, ekipamenduetako tarteko espazioen ezaugarrien lehen identifikazio bat egin ahal izan dugu: zein espazio okupatzen diren, zeintzuk ez, zein erabilera ematen zaien, zer nolako herritar sektoreek baliatzen dituzten espazio horiek, nortzuk geratzen diren kanpo…
Azterketa horren emaitzak “Topaleku biziak: Ekipamenduetako tarteko espazioak eta komunitategintza” argitalpenean jaso ditugu.
Ekipamenduetako tarteko espazioak komunitategintza aktibatzeko eta sustatzeko haziak izan al daitezke? Azter dezagun elkarrekin.
‘Topaleku biziak’ argitalpena:
TOPALEKU BIZIAK: Ekipamenduetako tarteko espazioak eta komunitategintza
Argitalpen honetan agertzen diren emaitzak lortzeko, hainbat disziplina eta iturri metodologikotan oinarritu gara; zehazki, antropologiatik, arkitekturatik eta herritarren partaidetzatik eratorritako begiradak eta teknikak baliatu ditugu.
Hauek dira aztertu ditugun hiru ekipamenduak: Tabakalera (Donostia), Lekuona Fabrika (Errenteria) eta Kulturarteko Plaza Feminista (Hernani).